ابدي بسلام الله يا حظرة الناس
واعوذ م الشيطان مع لعنة ابليس
واهدي سلامي عد من بالحرم داس
وادى المشاعر والمناسك بتقديس
اهل العراقي حملوني على الراس
سلامٍ معطر للرجال الاشاويس
ابيات اكتبها الى خيرة الناس
للمجلس اللي به رجالٍ نواميس
من ريحة الفنجان بنه بمحماس
لأهل الكرم ما طولت بالمحاميس
قندتها بالهيل عن صدعة الراس
فنجانها طيب على كل جليس
وقفيت ابياتي من السين والساس
وارقى بكم يرجال كل المقاييس
وألبس بكم يالابتي عقد الماس
وألبس من العزه خيار الملابيس
بركا بهواها ينبري ضيق لنفاس
طيبٍ يطيب من هواه النسانيس
في مجلس الاطياب اخيار لجناس
ما خالطة لجناب فيهم مجانيس
في شوفهم ترتاح نفسك م لنعاس
ويزول هم اللي تجيه الهواجيس
احساس طيب وحس وحساس وحساس
بالريح واطيب من عطور المعاريس
ياليت محسن جالس بوسط هالناس
روح واشهد ما دعانا مفاليس
يالله يارحمن يا خالق الناس
يالله يا فكاك عسر المحابيس
ترحم من اللي جمع بطيبه الناس
في اثنين فبراير تأسس تأسيس
رجل الشهامه ما تعود على الياس
حلال عثرات الامور المطاميس
وشيوخنا نرفع بهم هامة الراس
محمود بن زاهر ينسل الاشاويس
سلالة مشايخ لي بهم قوة البأس
اهل الجمايل بالشجاعة متاريس
وهذا حمد وحمود للطيب حراس
نعم الرجال ولي معاهم مجاليس
الشاهد الله ما دعونا على الياس
في كل سنه نلقى بلقاهم تنوميس
يا عود طيبٍ فاح ان قصه الفاس
عمر الزمن يا شيخ ما ظنه نحيس
انتو الحصون الشامخه وانتم الساس
وانتم حمانا ان حدا حادي العيس
والحرب لو تقرع طبوله ولجراس
في صفنا ما ينوجد رجلٍ خسيس
فينا المعاني الطيبه وفينا حماس
كلنا ناموس والشيخ الرئس
الرجل بالطيب واخلاقه تقاس
بسيرته ما بين ربعه والجليس
🌹🌹🌹
من شعر/ هلال بن عبدالله العبري
٢٢ / ٢ / ٢٠١٥م
ليست هناك تعليقات:
إرسال تعليق